Започнува судењето против Васил Јованов кој ја прегази Фросина Кулакова на пешачки премин

Во петок со почеток во 10 часот, започнува судењето против Васил Јованов, возачот обвинет за прегазување на Фросина Кулакова на пешачки премин. Јованов е обвинет за кривично дело „тешки дела против безбедноста на луѓето и имотот во сообраќајот“, за кое е предвидена казна затвор до 20 години. Судскиот процес ќе го води судијката Снежана Марковска во Основниот Кривичен суд во Скопје.

Според обвинението, на 29 јануари 2025 година, Васил Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на лице место.

Инаку, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.

Обвинението се однесува на периодот од 04.11.2022 до 30.01.2025 година, во кој Зоран Јованов дозволувал на својот син Васил Јованов да управува патничко моторно возило „Пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.