Трамп за сликата како папа: На лажните медиуми не им се допаѓа, но католиците ја сакаат
Американскиот претседател Доналд Трамп ја отфрли загриженоста дека сликата на која е прикажан како идниот папа, генерирана со вештачка интелигенција, е навредлива за католиците.
Спорната слика беше објавена во петокот на профилот на Трамп на социјалната мрежа Truth Social. Не е познато дали ја објавил самиот Трамп или некој од неговите соработници. Сликата предизвика поделени реакции. Поранешниот италијански премиер Матео Ренци изјави дека станува збор за „слика што ги навредува верниците, институциите и покажува дека водачот на глобалната десница ужива да биде кловн“.
Тимоти Долан, надбискупот на Њујорк кој минатата недела Трамп го препорача за папа, како и Католичката конференција на државата Њујорк, исто така изразија незадоволство.
„Дури синоќа ја видов“
На прашањето за негативните реакции од страна на католиците во врска со сликата, Трамп одговори: „Не мислете на католиците, мислете на лажните медиуми… католиците ја сакаат (сликата)“.
Изјави дека сликата, која беше споделена и од официјалниот профил на Белата куќа на мрежата X, не ја видел сè до неделата навечер.
„Немам поим од каде се појави. Можеби е направена со вештачка интелигенција. Но, не знам ништо за тоа. Ја видов дури синоќа. Всушност, мојата сопруга мислеше дека е симпатична. Рече: ‘Зарем не е убава?’“, раскажа Трамп.
Откако минатата недела се пошегува дека би сакал да биде новиот папа, сега изјави дека таа позиција сепак не е во неговите планови.
„Всушност, не би можел да се оженам. Колку што знам, папите не се големи љубители на бракот, нели? Не, колку што знаеме, не се“, нагласи тој.
