За време на војната во Газа, Израел доби 230 авиони и 20 бродови со воена помош од САД

Соединетите Американски Држави (САД) испратија 230 товарни авиони и 20 бродови натоварени со оружје и воена опрема во Израел од почетокот на конфликтот во Газа на 7 октомври, објавија во понеделникот израелските медиуми.

Американската воена помош вклучува артилериски гранати, оклопни возила и основна борбена опрема за војниците, пишува весникот „Једиот Ахронот“.

Израелското Министерство за одбрана ја проценува цената на тековната војна во Појасот Газа на околу 65 милијарди шекели (17 милијарди долари).

Весникот, повикувајќи се на официјален претставник на Министерството за одбрана, вели дека армијата потрошила поголем дел од муницијата во своите магацини на почетокот на војната.

Меѓутоа, Израел успеа да ги наполни своите залихи како подготовка за можна војна со целосни размери со либанската група Хезболах, се додава.

Најмалку 489 израелски војници се убиени во судирите со палестинските борци во Појасот Газа од 7 октомври, според израелската војска.

Израел започна со напади врз Појасот Газа по прекуграничниот напад на Хамас на 7 октомври. Оттогаш, 20.674 Палестинци се убиени, а најмалку 54.536 се повредени.

Израелските напади го оставија Појасот Газа во урнатини со половина од неговиот станбен фонд оштетен или уништен, а околу два милиони луѓе се раселени во густо населената палестинска енклава со недостиг на храна и чиста вода.

Се верува дека околу 1.200 Израелци биле убиени во нападот на Хамас.