За „Пулс“ уапсен и Драган Паунов, вработен во УЈП и брат на претседателката на Кривичен суд
Обвинителството во рамки на истрагата за трагедијата во Кочани покрена постапки против повеќе лица поврзани со корупција, злоупотреби и фалсификување документи.
Според информациите, притвор ќе се бара и за Драган Паунов, вработен во УЈП – Штип, кој се сомничи за примање поткуп по член 357 од Кривичниот законик и за оддавање службена тајна по член 360. Паунов е лишен од слобода.
Паунов е брат на в.д. претседателката на Кривичниот суд – Скопје, Даниела Димовска, а истрагата покажала дека тој бил во постојан контакт со синот на газдата на дискотеката „Пулс“, Дејан Јованов – Деко.
Коммуникацијата меѓу нив е дел од доказниот материјал.
Во сторијата на ИРЛ беа објавени пораки помеѓу Михајло Јованов и инспектори од УЈП, ДПИ и полицијата. Се посочуваат дојави до дискотеката пред инспекциски контроли, сомнежи за поткуп низ подароци и информации дека полициски инспектори биле редовни гости иако локалот работел без исполнети услови.
Од Обвинителството велат дека оваа комуникација е дел од доказите и за истата се вршат проверки.
Јавното обвинителство соопшти дека надлежностите на УЈП се ограничени на финансиски и даночни прашања и затоа институцијата не била опфатена со обвинението за пожарот во „Пулс“.
Проверки кај УЈП се водат единствено за евентуални коруптивни и други кривични дела на поединци.
Со обвинението се опфатени 34 физички и 3 правни лица. Дополнително, посебна истрага се води за 10 полициски службеници од Кочани и Штип во Обвинителството за организиран криминал, но без најави кога ќе заврши и дали ќе резултира со обвинение.
