ВУЛИН: Она што Рама не можеше да го доживее во Тирана, го доживеа во Атина
Според српскиот вицепремиер, Александар Вулин, „Голема Албанија“ можат да ја спречат само Србите и Грците.
„Следниот пат кога Владата на Грција ќе размислува за признавање на Косово, нека се сетат како изгледа пречекот на Еди Рама среде Атина. Она што Рама не можеше да го доживее во Тирана, го доживеа во Атина“, изјави Вулин.
Вели дека признавањето на Косово и приемот на Приштина во Советот на Европа, би бил неизмерен придонес на Владата на Грција и Дора Бакојани за создавање на `голема Албанија`.
„Голема Албанија` можат да ја спречат само Србите и српскиот свет, но и Грците, драги наши Грци, размислете за тоа“, рече Вулин.
Тој го коментираше албанскиот имиграциски состанок кој се одржа во Атина, на кој се обрати албанскиот премиер Еди Рама и покрај противењето на Грците.
Грчкиот весник Катимерини наведува дека овој настан разгорува нови тензии во односите меѓу Грција и Албанија.
Медиумот потсетува дека Рама пред собирот порачал дека „Грција е демократска земја“ која „не можела да спречи еден лидер да дојде во приватна посета и да им се обрати на сонародниците“.
Рама по Атина ќе ја продолжи турнејата по албанската дијаспора и на 26-ти мај ќе отпатува во Милано. Таму ќе се состане со сонародниците кои живеат во тој град на северот на Италија, а после тоа на 2-ри јуни ќе отпатува во британската престолнина Лондон, додека за 25-ти јуни е планирана посета на Рама на германски Дизелдорф.
