ВУЧИЌ: Бог да ме праша што сме им згрешиле на Бугарите, не би знаел да му кажам
Српскиот претседател Александар Вучиќ денеска изјави дека не знае што им згрешиле на Бугарите, по вчерашната одлука на осум земји да не ѝ дозволат на Србија да го отвори третиот кластер од преговорите со Европската Унија(ЕУ).
Покрај Бугарија, меѓу нив биле и Естонија, Летонија, Литванија, Шведска, Финска, Холандија и Хрватска.
„Бог да ме праша што сме им згрешиле на Бугарите, не би знаел да му кажам и објаснам. Мислам дека разбирам кои се вистинските причини, но знам дека нема да ги слушнете. За Хрватите сѐ ми е јасно, тука немам проблем да сфатам“, кажа Вучиќ.
Унгарија како актуелен претседавач со ЕУ за следната недела ќе закаже нов состанок, зашто меѓувладина конференција треба да се одржи меѓу 16 и 20 декември.
„Им благодарам ако го отворат третиот кластер, им благодарам и ако не го отворат. Важно е да продолжиме да се бориме и да разговараме со сите нив. Ние ќе се потрудиме следната година да бидеме најбрзо растечката економија во Европа“, кажа Вучиќ.
Српските медиуми вчера објавија дека не е постигнат консензус за оваа тема и на третиот состанок на амбасадорите на членките на ЕУ. Како главни причини биле наведени неусогласеноста на Србија со надворешната политика на ЕУ и санкциите за Русија, нејасното геополитичко определување на Србија и проблеми во владеењето на правото и во односите со Косово. Инаку, претходно Бугарија реагираше до Србија дека сака поголеми права за бугарското малцинство во Србија, иако нивниот број на ниво на државата е мал.
фото принтскрин
