Времето до крајот на неделата: Локални врнежи, потоа стабилно со пониски температури
Времето денес ќе биде променливо облачно, со слаб до умерен ветер од променлив правец. До крајот на денот се очекува зголемување на облачноста и локални врнежи од дожд, кои во текот на ноќта ќе бидат пообилни во западните региони.
Максималните дневни температури се движеа од 4 степени на Попова Шапка, 9 во Крушево и Маврови Анови, 12 во Претор, 14 во Тетово и Прилеп, 15 во Битола и Охрид, 16 во Скопје – Зајчев Рид, Берово, Кавадарци и Демир Капија, 17 во Скопје – Петровец, Крива Паланка и Велес, 18 во Виница, Штип и Струмица, а најтопло беше во Гевгелија со 21 степен.
Утре времето ќе биде претежно облачно со повремени врнежи од дожд, пообилни во западните делови каде локално може да наврнат над 25 литри на метар квадратен. Ќе дува слаб до умерен ветер од југоисточен правец.
Минималната температура ќе се движи од 7 до 12 степени, а максималната ќе достигне од 11 до 15 степени.
Во Скопје утре ќе биде претежно облачно со повремени, пообилни врнежи од дожд. Ќе дува слаб до умерен југоисточен ветер. Минималната температура ќе се спушти до 12, а максималната ќе достигне до 14 степени.
Според прогнозата, во сабота ќе преовладува променливо облачно време со повремени, послаби врнежи од дожд, а потоа следува период на стабилизирање на времето, со потпросечни температури за овој дел од годината.
