Во селото Бањска се уапсени уште двајца Срби

Ново апсење на Косово. Во селото Бањска се уапсени уште двајца Срби и запленет е арсенал оружје, информираше денеска косовската полиција. 

Тие се уапсени во хотел, а запленети се две возила, едно оклопно возило, како и едно тешко возило – багер, во кое е пронајдено поголем број различно оружје.

Меѓу запленетите оружја имало пушка од 30 мм, две долги пушки или митралези, еден снајпер, минофрлач и автоматска пушка, 74 чаури за пушката АК47, девет панцири и друга опрема.

Во Бањскиот манастир се пронајдени две пушки АК47 и еден панцир, кои наводно се одземени од локацијата каде што е убиен припадник на полицијата на Косово.

Дополнително, во соопштението се додава дека полициски единици се стационирани во атарот на селото Бањска и дека „таму го обезбедуваат и овозможуваат и пружаат помош според потребите и барањата на мештаните“.

Вкупниот број на уапсените за кои се смета дека се поврзани со пукањето во село Бањска и убиството на припадник на полицијата на Косово, е зголемен на осум, објави српски Телеграф.

Косовските власти тврдат дека шест лица од групата која изврши напад, се повредени и се лекуваат во Нови Пазар и бараат Србија да ги испорача овие луѓе. 

Најголемата партија на косовските Срби, Српска листа, прогласи тридневна жалост за смртта на тројцата Срби, кои беа убиени во Бањска, по нападот врз косовската полиција во неделата, јави дописникот на МИА од Приштина.

Владата на Република Српска го прогласи 27 септември за Ден на жалост поради „трагичните настани на Косово“.