ВМРО-ДПМНЕ го блокира законот со кој вработените во одбраната треба да земат двојно повисоки плати
Вработените во одбранта и натаму остануваат без награди и двојно зголемување на платите, оти пратениците од редовите на ВМРО-ДПМНЕ со амандмани го блокираат донесувањето на законот за вработените во одбраната.
„Не може да се глуми лажна загриженост дека се сака да се реши статусот на вработените во МО, а токму инвалидите од конфликтот и семејствата на тие кои државата ги прати да загинат да бидат на маргините. Таква политичка шизофренија не признаваме“, напишаа тие на друштвените мрежи.
Од друга страна пак, нејасно е зошто ВМРО-ДПМНЕ уште во 2008 година не го донесе на сила овој закон кога партијата имаше мнозинство од 61 пратеник.
Пратеникот на ВМРО-ДПМНЕ потсетува дека пратеничката група поднесе над 1.500 амандмани на предлог законот за вработените во одбраната со цел да се блокира неговото донесување и порачува дека така ќе биде додека не се реши статусот на семејствата на загинатите бранители.
Неодмана министерката за одбрана Славјанка Петровска во телевизиско интервју објасни кои се придобивките од ова законско решение и на кој начин Законот ќе влијае на унапредување на работните процеси во Министерството.
„Кога зборуваме за бенефитите и придобивките од овој закон дадени се многу позитивни решенија кои ќе ги подобрат работните процеси во Министерството. Не можете да очекувате вработените да бидат доволно мотивирани ако немате соодветна алатка, не само за парична награда или за зголемување на нивните плати, меѓутоа и за побрзо, поефикасно и се разбира правично унапредување во системот. Можам да кажам слободно дека платите ќе се зголемат и двапати повеќе. Значи раководителите на Секторите ако се цивилни, односно административни службеници би земале некаде околу просечната плата во администрацијата, зборам за тој ранг околу 40.000 денари, додека ако на позицијата има поставено воено лице кое има чин полковник, платата на тоа лице е некаде околу 76.000 денари“, рече министерката.
Покрај повисоките плати, постојат и низ други поволности што ги овозможува новиот Закон, како што е вработување без јавен оглас за работни места кои се дефинирани како критична специјалност, вработување без јавен оглас на лице со попреченост, работен однос без јавен оглас за еден невработен член на семејството на починат вработен во МО и на припадник на безбедносните сили, создавање на услови за градење на персонал за работа на НАТО позиции, пензионирање со 40 год пензиски стаж за мажи или 35 за жени или 64 години мажи, 62 жени од кои најмалку 15 години работен стаж во МО, бенефициран раб стаж 12/15, -пензија во висина од 80% од просечна нето плата од најповолните 10 години од пензискиот стаж.
