Владата ќе пресметува колку пари му требаат на едно семејство: Од 1 јануари нова официјална потрошувачка кошничка
Заменик-министерот за економија и труд Марјан Ристески најави дека од 1 јануари, покрај синдикалната минимална потрошувачка кошничка, Владата ќе воведе и официјална просечна потрошувачка кошничка за најмалку четиричлено семејство. Таа ќе се користи како основа за креирање економски политики и зачувување на животниот стандард.
Како што посочи Ристески, пресметката ќе се разгледува на седница на Економско-социјалниот совет закажана за 22 декември, а ќе се темели на цени од најголемите супермаркети, основни прехранбени производи и регионални разлики, со сезонски производи како овошје и зеленчук.
Тој најави и можност за воведување дополнителни кошнички – за двочлено и трочлено семејство, како и за пензионери. Во однос на минималната плата, Ристески рече дека зголемувањето според важечкиот закон треба да се случи до крајот на март 2026 година и да изнесува од 1.700 до 2.000 денари, освен ако социјалните партнери не постигнат поинаков договор.
