35 екс и актуелни градоначалници не кажуваат дали и колку се збогатиле од функциите – меѓу нив и Арсовска, Ѓорѓиевски, Јанчев…
Државната комисија за спречување на корупцијата (ДКСК) утврдила дека вкупно 54 поранешни и актуелни градоначалници не ја исполниле законската обврска за поднесување изјава за имотна состојба и интереси, по што ќе бидат покренати прекршочни постапки.
Како што соопшти Антикорупциската комисија, 35 лица не доставиле изјава за имотна состојба по престанокот на градоначалничката функција, додека 19 новоизбрани градоначалници не ја поднеле изјавата во законскиот рок од 30 дена по изборот на функцијата на Локалните избори 2025 година.
На списокот се наоѓаат и поранешната градоначалничка на Скопје Данела Арсовска, како и нејзиниот наследник Орце Ѓорѓиевски, кој се појавува во двете категории – како поранешен градоначалник на Кисела Вода и како новоизбран градоначалник на Скопје. Во двете категории се и ново-стариот градоначалник на Бутел Дарко Костовски, како и Андон Сарамандов од Гевгелија, Кутро Дудуш и други. Изјава по завршувањето на мандатот не доставил и градоначалникот на Битола, Тони Коњановски.
Од ДКСК информираат дека состојбата е констатирана по извршена проверка во регистарот на имотна состојба и интереси, а за сите лица кои не ја испочитувале законската обврска ќе бидат издадени прекршочни платни налози.
„Комисијата ќе продолжи да ја следи состојбата и за оние кои и понатаму нема да достават изјави, ќе бидат иницирани постапки за проверка на нивната имотна состојба и интереси“, соопштуваат од ДКСК.
Согласно Законот за спречување на корупцијата и судирот на интереси, глобата за непријавување на имотна состојба за избрани и именувани лица изнесува од 300 до 500 евра во денарска противвредност.
