Владата ја „освежува“ дипломатијата: Орхан Муртезани оди во НАТО, Илина Мангова во Лондон
Екс-министерот за европски прашања, Орхан Муртезани, е предлогот на Владата за нов македонски амбасадор во седиштето на НАТО во Брисел, пишува телевизија Сител од свои извори. Муртезани е дел од листата со девет нови амбасадорски имиња кои поминале на денешната владина седница.
Според изворите, за нов амбасадор во Лондон е избрана Илина Мангова, која доаѓа со богато искуство од раководството на Меѓународниот републикански институт (ИРИ). Останатите кандидати се главно дипломати од кариера со долгогодишен стаж во Министерството за надворешни работи (МНР).
Меѓу нив е и Линда Салиеска Иљазоска, актуелен дел од кабинетот на министерот Муцунски, која со своите 20 години дипломатско искуство е предложена за амбасадорка во Хаг.
Списокот е веќе усогласен меѓу претседателката Сиљановска-Давкова, Владата и МНР.
Покрај амбасадорите, именувани се и нови конзули за претставништвата во Мелбурн и во Солун.
Пред и официјално да заминат на своите мисии, сите деветмина кандидати ќе мора да ги претстават своите планови пред собраниската Комисија за надворешна политика, по што следи потпишувањето на указите од страна на претседателката. На истата собраниска процедура чекаат и претходно утврдените имиња за Тирана, Токио, Киев и Копенхаген.
Со овие именувања, бројот на дипломати испратени во мандатот на министерот Муцунски ќе достигне 18. Од нив, дури 11 се професионални дипломати од кариера, со што се исполнува законската обврска за професионализација на дипломатската мрежа.
