ВИДЕО Прекинато полетување на скопскиот аеродром на авионот за Љубљана

Патниците на летот W64783 на компанијата „Виз ер“, кои вчера требаше да отпатуваат од Скопје за Љубљана, останаа на тлото по неуспешен обид за полетување.

Според информациите и податоците од сервисот за следење на летови „Flightradar24“, авионот од типот Airbus A321-271NX (со регистарска ознака HA-LZP) уредно ја напуштил платформата и се упатил кон пистата за полетување.

Драмата се случила во моментот на самото полетување. Како што може да се види од графичкиот приказ на брзината, авионот започнал со залет и развил брзина од дури 112 јазли (приближно 207 километри на час), но полетувањето било веднаш откажано (aborted takeoff).

Наместо да се вивне во небото, леталото направило круг на самата писта и со мала брзина (такси) се вратило назад на стартната позиција – на паркинг местото на гејтот.

Веднаш по враќањето на платформата, патниците биле безбедно симнати од авионот.

Засега нема официјални информации која е точната причина за ваквата одлука на капетанот на летот. Според информации на 4NEWS.mk пилотот донел одлука најверојатно поради техничка грешка на леталото која се појавила при самото полетување.