ВИДЕО Ѓорѓиевски објави војна на дивоградбите: „Нема толеранција, багерите ќе го чистат Скопје од узурпатори“
Градоначалникот на Град Скопје, Орце Ѓорѓиевски, објави почеток на масовна и бескомпромисна акција за расчистување на бесправно изградените објекти и узурпираните јавни површини низ главниот град. Целта е да се ослободат тротоарите и пешачките зони и да се врати редот во урбаниот простор.
Ѓорѓиевски испрати јасна порака дека времето на толеранција за оние кои го узурпираат заедничкото заврши. Акцијата ќе се спроведува низ целата територија на Скопје, без исклучоци и без компромиси.
Првиот човек на градот нагласи дека јавниот простор мора да биде достапен за сите граѓани под еднакви услови, а не да биде заложник на поединци.
Градоначалникот ги повика скопјани да бидат партнери во овој процес и активно да се вклучат во воведувањето ред.
„Ги повикувам граѓаните на Скопје активно да се вклучат, да пријават објекти што го окупираат заедничкиот простор и да помогнат да изградиме град во кој владее ред, достоинство и еднаква пристапност за сите. Заедно градиме град каков што заслужуваме“, порача Ѓорѓиевски.
Акцијата продолжува со засилено темпо во наредниот период, со фокус на критичните точки каде што е загрозена безбедноста и движењето на пешаците.
