ВИДЕО Мистериозни светлечки објекти снимени над Казахстан
Невообичаени светлечки објекти беа снимени синоќа над Астана, Шимкент и други казахстански градови, предизвикувајќи лавина од коментари на социјалните мрежи, пишува украински Фокус. Се појавија различни теории, од метеорски дожд и НЛО до лансирање на балистичката ракета Орешник.
Астрономот Светлана Мошкина од Астрофизичкиот институт „Фесенков“ изјави дека снимката покажува делови од вселенски летала како горат. „Ова се случува кога делови од ракетите што се одделуваат по лансирањето влегуваат во атмосферата и се распаѓаат на фрагменти“, рече таа.
„Не ширете неточни информации“
Казахстанското Министерство за одбрана објави дека не е регистрирано нарушување на воздушниот простор на земјата. Според воените претставници, феноменот е сличен на остатоци од вселенски летала што влегуваат во атмосферата или метеорски дожд.
„Како по правило, сите овие објекти горат во густите слоеви на атмосферата пред да стигнат до површината на Земјата. Ги молиме граѓаните да останат смирени и да не шират неточни информации. Надлежните органи го проучуваат овој феномен и ќе објават појаснувања“, се вели во соопштението на министерството.
Светлата на небото предизвикаа бројни дискусии и разни теории на социјалните медиуми. Освен Казахстан, пријавени се и објекти видени над Киргистан и Русија. На руските канали на Телеграм се прошири тврдење дека Русите го лансирале „Орешник“ и дека паднал на границата со Казахстан.
Други корисници сугерираат дека можеби е дел од кинеска ракета „Жуке-2“ која изгорела за време на повторното влегување околу 22:40 часот по локално време во Астана. Споменени се и сателит „Старлинк“ и јапонска ракета. Руското радио 1 соопшти дека најверојатно станува збор за метеорски дожд.
