ВИДЕО Мајката на Алексеј Навални отишла на неговиот гроб ден по погребот
Мајката на рускиот опозициски лидер Алексеј Навални го посетила неговиот гроб ден по неговиот погреб, пренесува AFP и потсетува дека илјадници Руси ризикувале да бидат уапсени , но сепак отишле да се простат од него.
Алексеј Навални, најжестокиот критичар на претседателот Владимир Путин во изминатата деценија, почина минатиот месец во арктичка затворска колонија каде што издржуваше 19-годишна затворска казна под обвинение за „екстремизам“.
Неговата мајка Људмила Навалнаја го посетила неговиот гроб на гробиштата Борисов во јужна Москва. Придружувана била и Ала Абросимова – мајката на Јулија Навалнаја, прецизира и АФП.
Јулија Навалнаја, двете деца на двојката и братот на Алексеј Навални живеат во странство и не присуствуваа на погребот затоа што беа во опасност да бидат уапсени поради нивното противење на Владимир Путин.
Во меѓувреме, сепак, Јулија Навалнаја вети дека ќе ја продолжи работата на нејзиниот сопруг и рече дека „Путин го убил нејзиниот 47-годишен сопруг“.
Новинарите на АФП видоа мала група ожалостени како положуваат цвеќе на неговиот гроб и силно полициско присуство на гробиштата.
„Решив да дојдам затоа што сакам да го почитувам споменот на овој човек. За мене тоа стана симбол на упорност“, изјавил еден од посетителите на новинарот на Ројтерс.
А друг млад човек тврди дека Навални ги отворил очите за постоечката диктатура во Русија. „Внимателно ги следев сите негови истраги, им ги покажав на пријателите“, изјави тој за Ројтерс.
