ВИДЕО Kоњ се струполи од изнемоштеност во скопско Маџари, сопствениците насилно го влечат да стане
Скопјанка пренесува сведоштво за потресен и немил настан кој се случил денеска во населбата Маџари, во близина на пругите.
Глетката на која присуствувале случајни минувачи ја отсликува суровата реалност со која се соочуваат животните кои се користат за влечење запрежни коли.
Според сведоштвото, постар човек кој управувал со запрежна кола, придружуван од жена и дете, со жестоко мавање и викање го принудувал коњот да трча побрзо. Под притисок на ударите и брзината, животното во еден момент се сопнало или се лизнало, па се струполило на земја.
„Беше пресурова и тажна слика“, вели скопјанката која го пријавува случајот. Наместо помош, сопственикот продолжил да вика по животното. Иако тројцата се обидувале да го кренат, коњот бил видно повреден, со видливи рани на нозете и не можел да застане на нозе.
Овој случај е само уште еден потсетник дека животните кои се жртви на малтретирање заслужуваат заштита.
Насилството врз животните е казниво со закон и секој граѓанин кој ќе биде сведок на вакви сцени, треба веднаш да пријави до надлежните институции (Агенција за храна и ветеринарство или МВР), со цел да им се одземе правото на насилниците да чуваат и измачуваат животни.
