ВИДЕО Хаос во полскиот парламент: Менората изгасната со противпожарен апарат
Екстремно десничарскиот полски пратеник Гжегож Браун употребил противпожарен апарат за да ги изгасне свеќите на менората во парламентот, по што беше исклучен од седницата.
На видеото објавено од приватната телевизија ТВН24, Браун, член на Конфедерацијата, се гледа како зема апарат за гаснење пожар, шетајќи низ собранискиот ходник до свеќите, по што се создава бел облак, кој ги принудува безбедносните работници да ги евакуираат луѓето од тој дел од зградата.
Тој потоа се упати кон говорницата во собраниската сала, каде што го прогласи Ханука, еврејскиот празник кој започнува на 7 декември и завршува на 15 декември за „сатански“ и додаде дека неговиот чин ја враќа „нормалноста“.
На прашањето дали се срами од својот чин, Браун одговори дека треба да се засрамат оние кои учествуваат во „актите на глорификација на сатаната“.
Претседателот на Собранието Шимон Холовнија го исклучи од седницата и најави дека за неговиот чин ќе ги извести обвинителите. Браун ја напушти салата, откако претходно се ракуваше со други пратеници од екстремната десница.
„Нема да има толеранција за расизмот, ксенофобијата и антисемитизмот се додека јас сум претседател на парламентот“, предупреди Холовнија.
Во изјавата, полскиот кардинал Гжегож Рис и се извини на „целата еврејска заедница“ во Полска, велејќи дека се срами од постапките на Браун.
