ВИДЕО г. Јован: Во затворската соба бев со 40 лица, од 2017 годима имам неизлечива болест
До скоро за мнозинството во земјава познат како расколникот Јован Вранишковски, а од неодамна повторно владика на Македонската православна црква – Охридска архиепископија (МПЦ ОА). По решавањето на црковниот спор на релација Скопје – Белград или Охрид – Пеќ, автономната црква под закрилата на СПЦ, на чие чело беше Јован, се реинтегрираше во МПЦ ОА и, според договорот, Јован стана митрополит крушевско-демирхисарски.
Во новото издание на емисијата „360 степени“ кое ќе се емитува утре, за прв пат Вранишковски зборува за деновите поминати во затвор.
„Па дури и непристојно е, често пати и му е неприлично да кажам дека бев со 40 души во иста соба“, вели во интервјуто пред Васко Попетревски г. Јован.
Тој зборува и за неговата здравствена состојба.
„Во 2017 година еве се разболев со една болест за која велат дека е неизлечива. Мултиплекс склероза“, додава Вранишковски.
Интронизацијата се случи на 3 септември во црквата „Свети Никола“ во Крушево.
Г. Јован е роден во Битола, има 57 години, дипломира предвреме на Градежниот факултет при УКИМ во 1990 година, а потоа и на Богословскиот факултет во Белград во 1995 г. Одбранува докторат на Теолошкиот факултет во Солун во 2011 година.
