(ВИДЕО) ЧАДНИ БОМБИ И СОЛЗАВЕЦ: Ветераните на ОВК се против Специјален суд
Неколкумина се приведени по протестот против посетата на судијката на Специјалниот суд за Косово, Екатерина Трендафилова.
Полицијата го уапси претседателот на опозициската Социјалдемократска партија на Косово (ПСД), Дардан Молиќај по протестот против претседателката на Специјализираните комори на Косово, како што е официјалниот назив на меѓународниот трибунал за воени злосторства во Косово, Екатерина Трендафилова, јави дописникот на МИА од Приштина.
Трендафилова денеска допатува во работна посета на косовскиот главен град на средба со претставници на граѓанското општество. Активисти на ПСД сепак фрлија солзавец во внатрешноста на хотелот каде се одржа средбата.
Полицијата со солзавец и спрејови ги растера останатите демонстранти, при што не ги поштеди ниту новинарите, а некои од нив, според медиумите, биле и повредени.
Покрај Молиќај, полицијата попладнево уапси уште петмина активисти на партијата која ја создадоа незадоволни членови на раководството од владејачката Движење Самопределување, односно од начинот на кој истата ја води актуелниот премиер Албин Курти.
Претходно, лидерот на ПСД, во обраќање пред демонстрантите изјави дека претседателката на Специјалниот суд, Трендафилова е непожелна во Косово, бидејќи има политичка цел да ја претстави Ослободителната војска на Косово (ОВК) како злосторничко здружение.
Тој кажа дека „секогаш кога Косово е блиску до лоши договори со Србија, има прогон на припадниците на ОВК“.
Молиќај го обвини премиерот Курти дека се радува на престојот во Хаг на поранешните лидери на ОВК и дека, „додека ним таму им се суди, Курти им дава автономија на Србите во Косово“.
