ВИДЕО Арсовска до Ганиу: Криминалчуго, со фалсификат документи легализираш згради во Чаир, те чекам да се јавиш на главна каса!
Градоначалничката на Скопје, Данела Арсовска, денеска на нејзината Фејсбук страница обелодени сериозни обвинувања против градоначалникот на Општина Чаир, Висар Ганиу.
Таа во живо покажуваше зграда која, како што рече, била нелегално легализирана со фалсификувани документи и без никакво одобрение за градба.
„Си извршил легализации спротивно од закон, да објасниш како си ги впишал во Катастар, а од Град Скопје сите твои барања се одбиени. Ти си поднесувал фалсификувани одобренија од Град Скопје до Катастар, криминалецу, што цело време ми се закануваш. Ниту една ваква дивоградба нема во ниту една скопска општина, само Чаир вака си легализира со фалсификувани документи. Ти се лопов и криминалчуга. Дојди на главна каса, те чекам. Викаш оваа зграда се изградила во 2011 во фалсификуваните документи, а таа уште се гради“, вели Арсовска во видеото.
Таа вели и дека се краде струја и вода, а додава и дека досега спречила легализација на околу 150 дивоградби и обвини дека Ганиу веќе легализирал две слични згради со фалсификувана документација.
„Сите што оправдуваат криминал, сте криминалци како него бе. Или имаш стан во дивоградба или си градел дивоградба бе друже. Немој да ми кажуваш ти на мене дали сум била јас жива. ЕВе затоа што сакам да останам жива, го објавувам Висар Ганиу што ни се заканува, и по мене и по фамилија, и никој не му се плаши. Не ми се заканувај, ако си маж, дојди. Јас сум на терен, го бранам законот и јавниот интерес“, порача Арсовска, додавајќи дека Општина Чаир е единствената во Скопје каде, како што вели, со фалсификати се врши легализација на дивоградби.
Инаку, од Основното јавно обвинителство Скопје информираа дека по допрен глас и по добиено известување од СВР Скопје за сомненијата поврзани со нелегални објекти во Чаир, веќе се преземаат соодветни чекори.
