ПОЧНА ИЗГРАДБАТА НА АВТОПАТОТ БУКОЈЧАНИ – КИЧЕВО Се гради клучната делница на Коридорот 8
Почна изградбата на автопатот Букојчани – Кичево, делница долга 12 километри што треба да го поврзе постојниот автопат Охрид – Кичево со трасата кон Букојчани и да придонесе за заокружување на автопатското поврзување по Коридорот 8. Според најавите на Владата, изградбата треба да заврши во рок од четири години.
На поставувањето на камен-темелникот, премиерот Христијан Мицкоски оцени дека оваа делница е неопходна за целиот проект да добие целосна смисла, односно за автопатското поврзување меѓу главниот град и Охрид да стане функционална целина.
– Без оваа секција, сè останато што го правиме немаше смисла. Практично, целиот проект што го поврзува Охрид со главниот град, со Скопје, има смисла – рече Мицкоски.
Вицепремиерот и министер за транспорт Александар Николоски истакна дека делницата е шестиот проект што оваа Влада го започнува во областа на патната инфраструктура. Таа е важна не само за врската меѓу Скопје и Охрид, туку и за поврзувањето на западниот дел од државата, преку Тетово, Гостивар, Кичево и Струга.
– Овие 12 километри се исклучително важни и треба да дадат смисла и целина на целокупното автопатско поврзување, не само од Скопје до Охрид, туку и на целиот Коридор 8. Со ова автопатско поврзување, целиот коридор добива смисла – рече Николоски.
Тежок планински терен
Градежните работи почнуваат на местото каде што завршува автопатот Охрид – Кичево, а новата траса ќе продолжи кон Букојчани. Во меѓувреме, на делницата од Букојчани до Гостивар веќе се работи на изградба на автопатско решение.
Станува збор за планински терен што претставува сериозен инженерски предизвик. Николоски оцени дека изведувачите, заедно со надзорот и техничката поддршка, имаат задача да реализираат сложен проект, но изрази уверување дека работите ќе завршат во предвидениот рок.
– Се работи за терен којшто е планински, којшто е исклучително тежок, терен којшто бара многу знаење, многу искуство. Сметам дека изведувачите, заедно со надзорот и техничката поддршка, ќе можат да завршат одлична работа и сум убеден дека во предвидениот рок од четири години проектот ќе биде завршен – рече вицепремиерот.
Четири возни ленти и брзина до 130 километри на час
Проектот предвидува изградба на современ автопат со по две возни ленти во секоја насока. Секоја лента ќе биде широка 3,5 метри, а од двете страни ќе има помошни ленти широки по 2,75 метри. Проектираната брзина ќе изнесува од 110 до 130 километри на час.
Николоски најави дека Владата, Министерството за транспорт и Јавното претпријатие за државни патишта ќе им дадат целосна поддршка на изведувачите за реализација на проектот.
Дел од поширокото поврзување на земјата
Почетокот на изградбата е дел од планот за развој на Македонија како транспортна крстосница на два паневропски коридори – Коридорот 8 и Коридорот 10, преку вложувања во патната и железничката инфраструктура.
„Македонија нема излез на море, но има уникатна географска местоположба, која со силни инвестиции во автопатите и железниците треба да значи економски напредок за бројни генерации што доаѓаат по нас“, рече Николоски.
Мицкоски најави дека наскоро треба да биде пуштен во употреба и дел од автопатот Кичево – Охрид, на потегот од Извор до Врбјани, додека целата делница од Кичево до Охрид, според најавата на премиерот, треба да биде пуштена најдоцна во првата половина на 2027 година.
.
Извор: plusinfo.mk
