Уставниот суд на Романија ги потврди резултатите од претседателските избори
Уставниот суд на Романија денес ги потврди резултатите од претседателските избори во земјата одржани овој месец, објави агенцијата „Агерпрес“.
На свечената судска седница присуствуваа новоизбраниот претседател Никусор Дан и привремениот претседател на Романија, Илие Бологијан.
Во рок од 24 часа од потврдата на резултатите од романските претседателски избори од страна на Уставниот суд, претседателите на двата дома на парламентот мора да закажат заедничка седница на пратениците и сенаторите, на која новоизбраниот претседател, чиј избор е потврден, ќе положи заклетва.
Двата круга од претседателските избори во Романија на 4 и 18 мај беа повторени откако Уставниот суд го поништи минатогодишното гласање поради сомневања за руско мешање во корист на победникот од првиот круг во ноември – крајно десничарскиот независен кандидат Калин Георгеску – и пресуди дека целиот изборен процес мора да започне одново.
Во неделата, независниот претседателски кандидат и градоначалник на Букурешт, Никусор Дан, победи на претседателските избори со 53,60 проценти од гласовите. Неговиот противник, Георге Симион, лидерот на крајно десничарската партија Алијанса за единство на Романците (AUR), доби поддршка од 46,40 проценти од гласачите.
