УПОЗ ја прифати понудата на Владата: Плати повисоки за 8% во следните три години
По повеќедневни консултации и изјаснувања, синдикалните организации во рамки на УПОЗ дадоа зелено светло на предлогот на Владата за раст на платите во јавниот сектор. Со договорот се опфатени околу 7.800 вработени во државната управа и правосудството, чии примања ќе се зголемуваат за по 8 проценти годишно во наредните три години, со дополнително линеарно усогласување со порастот на минималната плата.
Од УПОЗ информираат дека огромно мнозинство од синдикалните организации го поддржале договореното решение.
– Според досега пристигнатите изјаснувања, 95 проценти од синдикалните организации сметаат дека прифатеното барање за зголемување на платите е поповолно и прифатливо, соопштија од Синдикатот.
Како што појасни премиерот, пресметката предвидува дека доколку во наредните три години на платата на административните службеници секоја година се додаваат по околу 1.500 денари од растот на минималната плата, а збирот потоа се зголемува за 8 проценти, плата која сега изнесува 35.000 денари за три години би достигнала околу 50.000 денари. Тоа претставува зголемување од приближно 40 проценти.
Во следниот период, синдикалните членови треба да добијат поединечни конечни договори кои ќе треба да бидат потпишани. Повисоките плати за административните службеници ќе започнат да важат од март, а ќе бидат исплатени со априлската плата.
Во меѓувреме, разговорите за растот на минималната плата остануваат без договор, откако преговорите заглавија во заострена реторика меѓу засегнатите страни.
