УБЕДИЛЕ СТОТИЦИ МАКЕДОНСКИ ГРАЃАНИ ДА ИНВЕСТИРААТ ВО НЕПОСТОЕЧКА ИНТЕРНЕТ ПЛАТФОРМА Битолчанка и Естонец се гонат за масовна измама
Секторот за компјутерски криминал и дигитална форензика, до Основното јавно обвинителство Битола, поднесе кривична пријава против 56-годишната М.К. од Битола и А.С.(38) од Естонија поради постоење основи на сомнение за сторено кривично дело „измама“ од член 247 од Кривичниот законик.
Во периодот од декември 2025 година до април 2026 година, преку мобилна апликација, на канал со неколку стотици претплатници, со ветување за наводни добивки кои никогаш не се реализирале, навеле голем број граѓани од целата држава да вложуваат финансиски средства на лажна интернет платформа и на тој начин им нанеле значителна финансиска штета.
До Секторот за компјутерски криминал и дигитална форензика пристигнале пет пријави од оштетени граѓани, кои во наведениот период биле измамени, но согласно податоците од финансиските извештаи од трансакциската сметка на првопријавената, во измамата оштетени се стотици граѓани од земјава, но повеќето од нив не го пријавиле случајот.
„Во врска со случајот беше спроведена повеќемесечна истрага во која беа вклучени повеќе домашни и странски институции и беа разменети информации, што резултитраше со откривање на идентитетот на сторителите. Исто така, во рамки на истрагата, Секторот за компјутерски криминал и дигитална форензика изврши информативен разговор со првопријавената, одзеде електронски уреди кои ги користела за остварување пишана комуникација преку апликацијата, а со форензичката анализа на екстрахираните податоци од одземените уреди, докажано е кривичното дело за кое е поднесена кривичната пријава“ – наведува Секротот за компјутерски криминал во соопштение.
Исто така се наведува дека е извршена стручна анализа на крипто-трансакциите и преку меѓународни безбедносни платформи биле обезбедени целосни информации за сопственикот на крипто-паричникот.
„Со оглед на растечкиот тренд на ваков тип измами, Секторот за компјутерски криминал и дигитална форензика апелира граѓаните да не веруваат во лесна и брза заработка преку интернет, каде измамниците преку социјалните мрежи, лажни профили и телефонски повици нудат инвестирање во криптовалути со ветувања за високи и сигурни приноси, притоа наведувајќи ги да уплатат пари на лажни инвестициски платформи, кои можат да изгледаат целосно легитимно“ – пишува МВР во својата објава на Фејсбук.
.
Извор: plusinfo.mk
