Турција дури следната година ќе ги исплати парите за рускиот гас?
Турција ја одложи исплатата на рускиот гас. Тоа е сума од 600 милиони долари за руски природен гас до 2024 година во согласност со договорот со Москва, изјавија денеска два неименувани извори.
Договорот предвидува можност за одложување на плаќањето на над четири милијарди долари до 2024 година.
„Уплатата на 600 милиони долари официјално е одложена за следната година. Голема улога (за пролонгирањето) има зголемување на цената на енергијата. Турција следниот месец би можела да го одложи плаќањето на повеќе сметки, во зависност од движењето на цената на енергијата“, изјави еден од неименуваните извори.
Турција зависи од увозот на енергија, а Русија е нејзин најголем снабдувач. Договорот за пролонгирање на плаќањето на гасот го намалува притисокот врз турските девизни резерви, кои се исцрпени со политиката за зајакнување на лирата.
Министерството за енергетика на Турција и на Русија, како и енергетските фирми Ботас и Газпром не ја коментираа информацијата.
Русија е под санкции поради војната во Украина. Претседателката на Европска комисија, Урсула фон дер Лајен ги повика 27 земји-членки на Европска Унија да преземат мерки против земјите кои го помагаат Кремљ и ги заобиколуваат санкциите на ЕУ кон Русија.
foto freepik.com/romanzaiets
