„Трпението е при крај“: До крај на февруари минимална плата од 600 евра или генерален штрајк!
Сојузот на синдикати на Македонија (ССМ) денеска ја заокружи серијата блокади со протест пред Владата, упатувајќи јасен ултиматум: доколку до крајот на февруари не се договори зголемување на минималната плата на 600 евра, работниците во март излегуваат на генерален штрајк.
Синдикатот бара итно менување на Законот за минимална плата и линеарно зголемување на сите останати плати за 100 евра. Претседателот на ССМ, Слободан Трендафилов, појасни дека трпението на работниците е при крај.
„Ако до крајот на февруари не седнат на маса за повисоки плати, во првата половина на март следува генерален работнички протест. Ќе обезбедиме превоз за сите, за да нема изговори,“ порача Трендафилов по седницата на Претседателството на ССМ.
Синдикалците остро ги отфрлија аргументите на работодавачите дека е потребна поголема продуктивност за повисоки плати. Повикувајќи се на податоци од Меѓународната организација на трудот (МОТ), Трендафилов изнесе фрапантни бројки:
Според ССМ, токму инсистирањето на „лажна продуктивност“ во изминатите три децении доведе до егзодус на најквалификуваниот кадар и нивните семејства од државата.
Синдикатот апелира до извршната власт сериозно да ги разгледа барањата на денешната седница. Тие предлагаат Владата да им „подаде рака“ и на бизнисите преку ослободување од придонеси, но само под услов тие средства да завршат директно во џебот на работникот.
Доколку не се постигне договор, во март ќе се случи само законското усогласување на минималецот, кое според проекциите изнесува скромни 1.500 до 1.700 денари. За ССМ ова е неприфатливо, со оглед на тоа што синдикалната потрошувачка кошничка само во јануари порасна за речиси илјада денари.
