Тројца работници затрупани при ископ на темели, продолжува црната серија на македонските градилишта
Скопје утрово се разбуди со уште една страшна вест од градилиштата. Голема трагедија се случи во скопската населба Кисела Вода, каде при ископ на темели за нова зграда дојде до масивно уривање на земјата при што беа затрупани тројца градежни работници.
Ова не е прв фатален инцидент во Кисела Вода оваа година. Само пред еден месец, на 13 март 2026 година, на објект во изградба во истата општина, 59-годишниот градежен работник Ж.С. од селото Герман, Кривопаланечко, го загуби животот откако падна од висина додека извршуваше работни задачи.
Овие настани се само дел од долгата низа несреќи на градилиштата низ државата, каде работниците ги губат животите затрупани во ровови поради необезбедени ископи.
Градежништвото и понатаму е една од најсмртоносните дејности за работниците во Македонија. Ова го потврдува најновиот Годишен извештај за несреќи при работа за 2024 година, подготвен од Македонското здружение за заштита при работа (МЗЗПР).
Во текот на 2024 година се евидентирани вкупно 133 несреќи, од кои дури 17 завршиле со смртни последици. Секторот градежништво бележи вкупно 22 несреќи и 4 загинати работници, со што го дели неславното прво место по смртност со секторот транспорт.
Експертите од МЗЗПР предупредуваат дека поради недоволната транспарентност и сивата економија, реалната бројка на настрадани работници е веројатно многу поголема од официјално пријавената.
Полицијата и трудовите инспектори допрва треба да утврдат дали на денешното градилиште во Кисела Вода биле испочитувани строгите стандарди за обезбедување на ископите.
