Градежништвото останува „црна дупка“, 17 работници загинале на работното место во државата
Безбедноста и здравјето при работа во Македонија континуирано се влошуваат, а градежниот сектор останува една од најопасните дејности. Ова недвосмислено го потврдува новиот „Годишен извештај за несреќи при работа за 2024 година“, подготвен од Македонското здружение за заштита при работа (МЗЗПР).
Според податоците, во 2024 година се евидентирани вкупно 133 несреќи на работното место на национално ниво, што претставува сериозен скок во однос на 108-те несреќи во 2023 година. Билансот на жртви е поразителен: 17 работници го загубиле животот минатата година, наспроти 15 во 2023 година.
Градежништвото е рангирано како трета дејност по вкупен број на несреќи (22 евидентирани случаи), веднаш зад јавната управа (26) и преработувачката индустрија (25). Меѓутоа, кога станува збор за фатални исходи, градежништвото е апсолутен лидер со 4 загинати работници, делејќи го првото место со секторот транспорт. Статистиката открива дека најчесто страдаат повозрасни мажи меѓу 55 и 64 години, а најголем број несреќи се случуваат во Скопје, Битола и Прилеп.
Експертите предупредуваат дека сивата економија е главниот двигател на овие црни статистики. Директорката на Државниот инспекторат за труд (ДИТ), Јована Тренчевска, посочува дека неформалното вработување во државата опфаќа околу 13,5%, а прекршувањата на трудовото право се најзастапени токму во градежништвото и гастрономијата. Работниците често се пријавени на половина работно време или воопшто немаат договор, што ги остава без основни средства за лична заштита.
Дополнителен ризик носат и големите инфраструктурни проекти кои се под притисок на рокови. На пример, на изградбата на автопатот Кичево-Охрид, каде работат над 900 работници , беа забележани повеќе инциденти. На 29 јануари 2025 година, 51-годишниот работник З.Т. од Кичево падна и почина при извршување работни задачи на трасата, додека претходно на истиот автопат тешко беше повреден и 51-годишен работник од Турција кој падна од скеле.
