Трипуновски: Сега се апси, цела влада на СДС тонеше во криминал
Од ВМРО-ДПМНЕ денеска излегоа со остра реакција кон Љупчо Николовски (СДСМ), откако тој коментирал гостување на претставник на владејачката партија во централниот дневник на ТВ Сител.
„Љупчо Николовски очигледно не може да го разбере моето гостување во централниот дневник на ТВ Сител каде јасно и прецизно за народот ја објаснив целата ситуација, но толку му е капацитетот. Умот го користи исклучиво за криминал и ширење страв и паника кај земјоделците,“ се наведува во соопштението од ВМРО-ДПМНЕ, кое МИА го пренесе интегрално.
Од партијата велат дека политичката кариера на Николовски е завршена и дека тој со манипулации се обидува вештачки да се одржи во јавноста, „брзо заборави што им порачаа граѓаните на локалните избори пред скоро две недели“.
„ОЈО да го истражи неговото незаконско работење“
Наместо да глуми загрижен, од ВМРО-ДПМНЕ го повикаа Основното јавно обвинителство (ОЈО) да започне истрага за, како што велат, „неговото незаконско работење како поранешен министер“.
Во однос на случајот во Агенцијата (за кој најверојатно се разговарало на ТВ Сител), од партијата велат дека нема простор за загриженост.
„Повторувам, нема простор за загриженост. Брисел ја поздрави брзата реакција на Владата за истражување на случувањата во Агенцијата. Претходно СДС во опозиција кодошеа и ја кочеа Македонија надвор, но тоа сега не им успева,“ стои во реакцијата.
„Сега се апси, нема повеќе наш и ваш“
Од ВМРО-ДПМНЕ му порачаа на Николовски дека принципот на владеење на СДС е завршен и дека „сега има закон, правила и прописи кои мора да се почитуваат“.
„На крај би му препорачал, Љупчо ти текнува кога беше антикорупционер и врвно достигнување ти беше броењето на испиени чаши со вода на министрите, додека тоневте во криминал цела влада? Епа сега за разлика од претходно, се апси, нема повеќе наш и ваш (…) Секој што се огрешил пред законот и направил злоупотреба на службената позиција мора и ќе одговара,“ заклучуваат од ВМРО-ДПМНЕ.
