Транспортерите на поранешно „Фени“ останаа со празни раце од стечајот
Без околу 3 милиони евра останаа 80 транспортни фирми, односно превозници на производите на поранешно „Фени“, откако стечајната маса собра пари само да ги исплати работниците, односно нивните плати, кои имаат предност, објави ТВ24.
Според превозниците, „Еуроникел“ на компанијата Дабл Игл зад која стои турски Јилдирим се продала за само 18 отсто од проценетата вредност. Се собрале само 1,8 милиони евра колку за да се обештетат вработените.
– Нашите пари горат, на 100 превозници. Наместо 9,5 милиони евра, си направиле само 1,8 милиони евра, си изгласале доверителите, колку нив да ги исплатата, изјави еден од транспортерите за ТВ24. Од таму најавија дека идната недела ќе има предупредувачки протест со возење на камионите околу комбинатот.
Турски ,,Јилдирим” во мај го купи комбинатот за фероникел, поранешно „Фени” од Кавадарци, а работниците сукцесивно треба да се враќаат на работа.
Некогашниот гигант од Кавадарци, кој до пред некое време вработуваше околу 800 работници, во изминатиот период се соочуваше со проблеми, вработените протестираа, а компанијата која беше со странски газди, замина во стечај. Вработените редовно потсетуваат дека илјадници фамилии егзистираат од топилницата, имајќи ги во предвид и транспортните компании ангажирани за комбинатот.
