Трагедија во гостиварско: 48-годишен работник загина при одглавување на заглавена сајла на кран
Во гостиварскиот регион се случи несреќа со смртен исход за време на изведување градежни работи на приватен објект, при што животот го загуби 48-годишен маж од Тетово.
Како што информираат од полицијата, случајот бил пријавен на 21.04.2026 година во 17:00 часот во Полициското одделение Галате. Несреќата се случила во селото Градец, кога работникот се обидувал да одглави заглавена сајла на кран, при што дошло до ненадејно пукање на метален дел од конструкцијата.
Од силниот удар во пределот на главата, мажот се здобил со тешки повреди кои биле фатални. На местото веднаш пристигнала екипа на Итната медицинска помош, но лекар констатирал смрт.
Увид на местото извршиле јавен обвинител и полициски екипи од ОВР Гостивар, а за случајот бил известен и надлежен инспекциски орган, кој треба да ги утврди околностите под кои дошло до несреќата.
По наредба на јавен обвинител, телото на починатиот е дадено на обдукција, која ќе даде дополнителни информации за причините за смртта.
Надлежните институции најавуваат детална истрага за да се утврди дали биле почитувани сите безбедносни мерки при изведување на градежните работи.
