Тошковски објави дека целосно е расчистено убиството кај Мавровка

Министерот за внатрешни работи, Панче Тошковски преку фејсбук информираше дека СВР Скопје целосно го расчистило убиството пред Трговскиот центар Мавровка.

– СВР Скопје целосно ги расчисти кривичните дела „убиство” и „убиство во обид“, кои беа извршени на 20.8.2024 на паркинг просторот позади трговскиот центар Мавровка, каде што со употреба на огнено оружје беше убиен В.Е.(58) од Скопје и на ул.„Стојна Стефкова“, каде со пиштол беше пукано кон полициски службеници од Единицата за интервентна полиција при СВР Скопје. Имено, по преземени мерки и брза реакција на СВР Скопје, специјалните полициски сили, хеликоптери и дронови беше фатен и лишен од слобода сторителот на кривичните дела Е.К.(39) од Скопје.

Веднаш потоа, од Единицата за насилен криминал – Одделение за крвни и сексуални деликти при СВР Скопје беа извршени увиди на местата, беа извршени разговори со сведоци како и претреси во домови на неколку локации, беа прегледани видео записи и беше извршена претрага на терен за обезбедување на материјални докази како што се возила, пиштол, чаури и други одземени предмети. Од страна на Одделот за форензички испитувања при МВР извршено е вештачење на чаури и пиштол со кое вештачење се поврзуваат двете кривични дела со сторителот Е.К.

По обезбедување на целокупниот доказен материјал, Единицата за насилен криминал – Одделение за крвни и сексуални деликти при СВР Скопје во координација со Основното јавно обвинителство Скопје, против Е.К. поднесе кривична пријава по брза постапка поради постоење основи на сомнение за сторено кривично дело „убиство” казниво по член 123 став 2 точка 4, кривично дело „убиство” во обид, казниво по член 123 во врска со член 19 и кривично дело „неовластено изработување, држење, посредување и тргување со оружје или распрскувачки материјали” казниво по член 396 од Кривичниот законик.

За второто лице кое беше лишено од слобода вчера до овој момент не е утврдена поврзаност со настанот и е ослободен, а се преземаат интензивни мерки за пронаоѓање и на уште едно инволвирано лице за кое постои сомневање дека помагало во извршувањето на кривичното дело “убиство“ – напиша Тошковски.

Претходно, поранешната министерка за одбрана Славјанка Петровска во емисијата „КликПлус“ ТВ21 покрена сомнеж дека лицата осомничени за убиството на 59-годишниот Васил Ефтимов се затвореници кои избегале. Петровска го прашува МВР зошто не ги објавува во јавноста имињата на уапсените и третоосомничениот по кој се трага.

„Дали МВР не ги открива иницијалите на уапсените, ниту на тој што се бара, затоа што фер би било да се покаже кој се бара, можеби ќе го сретнеме на улица и како граѓани ќе помогнеме. Дали затоа што се луѓе кои се затворени и  наместо да бидат во затвор, тие излегуваат на улица. МВР има распишано потерници, сепак не можат да ги најдат повеќе од 30 дена. За жал, требаше да се случи убиство во центарот на Скопје, еден од нив да биде уапсен, а за другиот сега да се организира акција за негово пронаоѓање“, изјави меѓу другото Петровска.

Според извори на ТВ21 во МВР, полицијата трага по Адем Куртовиќ, како третоосомничен за вчерашното убиство кај ТЦ „Мавровка“ во Скопје. Куртовиќ, според неофицијални извори, вчера пукал во полицијата. Убиениот Васил Ефтимов (59), имал златарска работилница во ТЦ Бисер во Скопје.