„ТОЈ Е МНОГУ ГЛУПАВА ЛИЧНОСТ…“ На Трамп не му се допаѓа ставот на Бајден, еве што мисли екс американскиот претседател за ситуацијата на Блискиот Исток
РЕПУБЛИКАНСКИОТ американски претседателски кандидат Доналд Трамп ја поддржа израелската војна против Хамас и рече дека ќе реагира на ист начин како Израел по нападот на 7 октомври.
Тој, сепак, додаде дека Израел мора да ја прекине војната во Појасот Газа бидејќи ја губи меѓународната поддршка поради сликите кои доаѓаат од таму, објави денеска израелскиот дневен весник „Израел Хајом“.
– Убиствената кампања на Хамас на југот на Израел е една од најтажните работи што сум ги видел. Сега, кога го кажав тоа, велам и дека Израел мора да стави крај на таа војна – рече Трамп.
Тој жестоко го критикуваше американскиот претседател Џозеф Бајден за начинот на кој се однесува кон Израел, дури и обвинувајќи го за војната во Појасот Газа.
– Не може да зборува. Тој е многу глупава личност. Неговата надворешна политика 50 години беше ужасна. Ако ги прашате луѓето кои биле со него во други администрации, ќе ви кажат дека тој е слаб, неефикасен претседател. „Хамас никогаш немаше да го изведе тој напад доколку јас бев претседател“, рече Трамп.
Говорејќи за израелски дневен весник од неговиот дом во Флорида, тој исто така го изрази своето разочарување од Евреите кои не го поддржуваат, велејќи дека „го мразат Израел“.
