Тесла бележи пад од 49% во продажбата во Европа
Продажбата на автомобили „Тесла“ во Европа се намали за 49% во април во споредба со истиот месец минатата година, и покрај зголемувањето од 27,8% на продажбата на електрични возила, покажуваат податоците на Европската асоцијација на производители на автомобили (ACEA). Надградената верзија на Model Y, главниот адут на Tesla, досега не успеа да ги оживее резултатите од продажбата на американскиот производител во регионот.
Вкупната продажба на автомобили во Европа забележа мал пад од 0,3%, додека електричните и plug-in хибридните модели постигнаа најголем раст.
Ова е четврти месец по ред како „Тесла“ бележи пад на продажбата во Европа. Аналитичарите истакнуваат дека компанијата се соочува со повеќекратни предизвици – од негативни реакции на политичките ставови на извршниот директор Илон Маск, до лошиот прием на новата верзија на Model Y, па сè до сè посилната конкуренција од европските и кинеските производители.
Уделот на „Тесла“ на европскиот пазар падна на само 0,7%, од 1,3% минатата година, објави „Ројтерс“.
Европските производители на автомобили се обидуваат да ги намалат трошоците додека се борат со силна конкуренција, американските царини за увоз на возила и забавувањето на глобалната економија. Иако трговските тензии меѓу САД и Кина донекаде се намалија, пазарните перспективи остануваат неизвесни.
Во април, вкупно 1,07 милиони возила се продадени во земјите од Европската Унија, Велика Британија и Европската асоцијација за слободна трговија (ЕФТА), што претставува намалување во споредба со растот од 2,8% во март.
Само во ЕУ, без Велика Британија и ЕФТА, вкупната продажба на автомобили оваа година се намали за 1,2%.
Побарувачката за електрични возила продолжува да расте. Регистрациите на возила на батерии (BEV) се зголемија за 26,4%, на хибридни возила со приклучок (PHEV) за 7,8% и на хибридни електрични возила (HEV) за 20,8%.
