СЗО повикува на итна акција за смртни случаи од екстремни топлотни бранови
Директорот на Светската здравствена организација (СЗО) за Европа, Ханс Клуге, истакна дека е „очајно и итно неопходно“ да се справи со климатската криза.
Потсетувајќи на 60.000 смртни случаи во Европа минатата година поради екстремни горештини, Клуге рече дека бројот на смртни случаи од екстремни горештини се очекува „да се зголемува од година во година“, пренесува Ксинхуа.
Сегашните „опасни зони“ ги вклучуваат јужна и источна Европа, рече Клуге, повикувајќи ја јавноста редовно да ги проверува временските извештаи, да ги следи локалните упатства и да се информира за здравствените ризици поврзани со временските услови.
– Покрај прилагодувањето на новата реалност ова лето, мора да се осврнеме на годините и децениите што ни претстојат – рече Клуге и нагласи дека климатската криза претставува егзистенцијална закана за човечкиот род.
