Сведоштво на придружниот вокал на ДНК: Задната врата беше заклучена, настана стампедо – сцената беше како хорор
Со емотивно и потресно сведочење пред Судот, Ана Костадовска, придружен вокал и соработник на групата ДНК, ја опиша драмата што се случувала ноќта на трагичниот настан во дискотеката во Кочани.
Костадовска појасни дека не била постојан член на бендот, туку била ангажирана по потреба, зависно од настапите. Заедно со неа настапувала и Сара Пројковска, со која, како што рече, има блиска пријателска и професионална соработка.
На прашање од обвинителството околу ангажманот, одбраната реагираше со приговор дека сведоците треба да одговараат само на прашања поврзани со кривичните дела, но Судот не го прифати приговорот.
Сведокот посочи дека за техничката поддршка бил задолжен Мартин Атанасов, додавајќи дека лично никогаш не видела кој ги поставува прскалките на сцената, иако тие со години се користеле без да предизвикаат проблеми.
„Стоеја до нас, прскаа и во опремата, но никогаш претходно немало инцидент“, изјави Костадовска.
Таа раскажа дека на 15 март во Кочани пристигнале со автомобил заедно со Андреја и Сара, додека Панчо пристигнал подоцна. Наместо класичен бекстејџ, изведувачите се подготвувале во импровизирана просторија одвоена од дискотеката, каде имало и импровизирано тоалет.
Концертот започнал околу 1:30 часот, а објектот бил преполн. За да стигнат до бината, изведувачите морале да се пробиваат низ публиката.
Според сведочењето, прскалките секогаш се активирале на истата песна, но овојпат ситуацијата брзо излегла од контрола.
„Почувствував топлина и кога погледнав нагоре – гореше“, рече таа.
Откако се симнала од бината, забележала врата и ги повикала останатите да излезат, но утврдиле дека е заклучена со катанец. Потоа се упатиле кон шанкот во обид да најдат излез, кога состојбата веќе ескалирала.
„Се слушаа пукања, пластиката почна да пука, беше многу жешко. Настана стампедо и не можевме да излеземе“, сведочеше Костадовска.
Таа и Сара биле заедно до делот кај тоалетите, но во метежот биле оттурнати и разделени. Костадовска паднала непосредно пред излезот, затрупана од луѓе.
„Имаше страшен мирис што те тераше да заспиеш. Се трудев да останам свесна. Еден дечко до мене не држеше будни сите. Ногата ми беше приклештена, имаше луѓе над мене. Сцената беше како хорор“, изјави таа.
Во еден момент почувствувале свеж воздух, што им дало надеж дека излезот е отворен. Со помош на непознато лице успеала да ја ослободи ногата и да излезе надвор.
„Не се сеќавам кој беше момчето што ми помогна, но ми го спаси животот“, рече Костадовска во сведочењето.
