Судството со заеднички одговор до Премиерот: Вашите коментари се неаргументирани напади и ја рушат независноста
Судскиот совет, Врховниот суд и Здружението на судии денеска преку заедничко соопштение упатија остра реакција до Премиерот, обвинувајќи го дека неговите коментари за судството „веќе подолго време ја преминуваат границата на доброто однесување“ и прераснуваат во „неаргументирани и паушални напади“.
Во писмото адресирано до „Господине Премиер“, врвот на судската власт порачува дека неаргументираната критика има за цел „севкупната општествена апатија да се префрли како вина на судовите“, наместо да се понудат конкретни решенија за проблемите.
Судовите не се трошок, туку полначи на буџетот
Трите институции остро ги отфрлија перцепциите за финансискиот товар на судството врз државата.
„Судскиот систем никогаш не генерирал долгови, па оттаму нејасно е каква е поврзаноста на судството со државниот долг од 2 милијарди евра“, се наведува во реакцијата.
Напротив, тие тврдат дека судовите се тие кои ја полнат државната каса.
„Сосема спротивно, токму судовите, преку наплата на паушали и парични казни, со години наназад ја полнат државната каса, а за возврат не добиваат никаков поврат од Буџетот, во смисла на нови вработувања, дигитализација на услугите, опремување на судниците и сл.“, стои во соопштението.
„Извршната власт ја поткопува независноста“
Повикувајќи се на последниот извештај на Европската комисија (ЕК), од судството велат дека токму во тој документ е нагласено оти најголемиот проблем е „поткопана од постојаното мешање на извршната и законодавната власт“.
Како дополнителен клучен проблем, тие ја цитираат и финансиската зависност од државниот буџет. „Ова се проблеми кои државата мора да ги поправи, бидејќи истите се суштински за Европската перспектива на земјата“, порачуваат судиите.
На крајот, судските власти го потсетуваат Премиерот дека со неговите коментари се нарушува уставниот принцип на рамноправност на трите власти – судска, законодавна и извршна.
„Судската власт е уставна категорија, а Уставот и независноста на судската власт треба да се почитуваат“, заклучуваат во соопштението Судскиот совет, Врховниот суд и Здружението на судии.
