Судењето за убиството на Вања и Панче продолжува на 24 март
На денешното судење за убиството на Вања и Панче, обвинетиот Велибор Манев беше испитуван од Љупчо Палевски и неговиот адвокат, Јовица Страшевски.
Манев сведочеше дека грабнувањето на Панче Жежовски траело околу 40 минути. Според неговите тврдења, Палевски ги уверувал дека „сè е во ред“, по што тој лично управувал со возилото на Панче, ставил гориво и продолжиле кон местото на земуницата.
Во врска со телефонот на Панче, Манев изјави дека дознал од Палевски каде бил пронајден. „Лично видов како влегува во куќата, а потоа, откако ставивме гориво, ни кажа дека телефонот го извадил од полначот и го фрлил во дол“, рече Манев.
Судењето продолжува во понеделник, откако денеска беше сослушан Манев. Палевски го испрашуваше за временските рамки на настаните, посочувајќи на несоодветности во неговите претходни искази. Манев одговори дека тие разлики се должат на неговата ментална состојба при давањето на изјавите. „Првите две верзии ги дадов во состојба на збунетост, а подоцна ја кажав вистината“, изјави тој.
За убиството на Вања, Манев потврди дека бил присутен и детално го опиша моментот кога Палевски ја убил. „Бев на 10-15 метри од него кога видов како носи перниче и пука. Потоа извади алати и ни нареди да ископаме дупка и да ја закопаме“, рече тој.
Во текот на расправата, Манев сведочеше дека откако пристигнале на местото, Палевски ладнокрвно запалил цигара и рекол дека на интернет веќе се дига тревога за исчезнувањето на Вања.
На прашањето зошто нема траги од крв, Манев одговори дека Вања била ставена во вреќа, која подоцна Палевски ја фрлил во возилото на Панче.
Манев беше прашуван и за движењата на возилата, на што одговори: „На снимките се гледа дека во ‘Рено Кангу’ има двајца, а во ‘Цитроенот’ една личност, бидејќи другата била на задното седиште“.
Прашан зошто не открил порано дека алатот со кој бил закопан Панче бил кај него дома, Манев рече дека верува оти лопатата била земена за вештачење. На прашањето дали Палевски ја испрашувал Вања, Манев потврди дека тој разговарал со неа и спомнал дека ги познава нејзините родители и дедо.
Тој исто така посочи дека Палевски ја одлепил траката од устата на Вања, ја фотографирал со вперен пиштол, а потоа, откако ја убил, го спакувал оружјето заедно со три мотороли и наредил на некого да го уништи доказниот материјал.
Манев тврдеше дека одредени делови од неговата изјава биле дадени под притисок. „Ме тераа да кажам дека дупката била ископана претходно. Наводно, некој друг го признал тоа под тепање“, рече тој, додавајќи дека никогаш не признал дека извршил убиство.
На судењето, Манев беше испитуван и од адвокатите на Влатко Кешишев и Александар Ѓорчевски. По расправата, адвокатот Владимир Туфегџиќ, кој го застапува таткото на Вања, изјави дека сведочењето потврдува дека Александар Ѓорчевски нема врска со случајот. Од друга страна, адвокатот на Палевски, Јовица Страшевски, смета дека Манев изнел невистини.
Судењето продолжува на 24 март, кога Манев ќе биде испитуван од судот, а сведочења ќе дадат и Боре Видевски, Влатко Кешишев, Александар Ѓорчевски и на крај Љупчо Палевски.
Според обвинението, Палевски, Видевски, Манев, Кешишев и Ѓорчевски заедно испланирале киднапирање на 14-годишната Вања за да изнудат откуп од нејзиното семејство. Панче Жежовски бил грабнат за да им го отстапи своето возило „Цитроен“, кое планирале да го користат за киднапирањето во Скопје. Вања и Панче беа пријавени за исчезнати на 27 и 24 ноември, а нивните тела беа пронајдени на 3 декември 2023 година, во близина на Скопје и Велес.
