ССМ: Минималeцот е зголемен без нас, ова е преседан!
Од Сојузот на синдикати на Македонија(ССМ) велат дека минималецот е зголемен без нив, што е преседан.
Минималната плата од април ќе се зголеми за 1.812 денари и ќе изнесува 24.379 денари, но одлуката е донесена без консултации со синдикатите. Вака тврди Трпе Деаноски од УПОЗ. Тој изјави дека ова е првпат од 2012 година минималецот да се зголеми без учество на работниците и работодавачите во социјалниот дијалог.
„Првпат се случува ова, но со оглед на состојбата во државата, веројатно нема да биде последен пат. Во петок ќе одржиме седница на ССМ за да ги одредиме следните чекори“, изјави Деаноски.
Заменик-министерот за економија, Марјан Ристески, објасни дека ваквата одлука се должи на фактот дека сега ниту еден синдикат нема репрезентативност.
Минималецот се утврдува еднаш годишно во март и се пресметува врз основа на 50 отсто од просечната исплатена плата и 50 отсто од зголемувањето на трошоците за живот од претходната година.
ССМ бараше минималната плата да се зголеми за 6.000 денари, односно да изнесува 500 евра, а дел од придонесите да ги плати државата во рок од 12 месеци. Македонија е меѓу земјите со најнизок минималец во регионот.
