ССМ: Доколку минималната се зголеми на 600 евра, а сите останати плати за 6.000 денари, повеќе нема да не гледате на улица!
Сојузот на синдикати на Македонија (ССМ) денеска го блокираше влезот на Владата на булевар „Илинден“ во знак на притисок за зголемување на минималната плата. Претседателот на ССМ, Слободан Трендафилов, појасни дека синдикатот остава простор за договор до крајот на февруари, но доколку барањата не бидат исполнети, во првата половина на март следува генерален штрајк и голем работнички протест, со организиран превоз од останатите градови за сите кои ќе сакаат да учествуваат.
„Бараме минималната плата да се зголеми на 600 евра, а сите останати плати за разликата до новата минимална плата, најмалку за 6.000 денари. Доколку Владата го исполни тоа барање, нема повеќе да ме гледате на улица. Се додека не се исполни, ќе продолжиме со протести“, порача Трендафилов.
Претседателот на ССМ го оцени сегашното зголемување на минималната плата минатата година како неприменливо, бидејќи било донесено без согласност на Економско-социјалниот совет, спротивно на законот. Тој истакна дека барањата на синдикатот се реални и дека во државниот буџет има средства, но тие се лошо распоредени.
„Минималната плата не е зголемена во последните 24 месеци во согласност со растот на синдикалната минимална кошница. Ако во март се усогласи законот, зголемувањето ќе биде до 1.700 денари. Ако некој смета дека треба да се откажеме, слободно нека го каже, но ако смета дека треба да се бориме – треба да излезе на улица со нас, затоа што само така можеме да ги заштитиме работничките права“, додаде Трендафилов.
Со денешната блокада на Владата, ССМ ја заврши втората фаза на своите активности, по претходните блокади на Собранието и Стопанската комора. Од Владата засега нема реакција, а синдикатот очекува почеток на преговори со работодавачите, со цел да се постигне договор во рамки на трипартитниот дијалог предвиден од МОТ.
Работодавачите, од своја страна, посочуваат дека зголемувањето на платите би можело да се одрази на работењето на компаниите и бараат субвенции за дел од придонесите, предлог што лани не беше прифатен од Владата.
