СПРЕМЕТЕ СЕ: Во сабота овие населени места во Скопје ќе бидат без вода 15 часа!
Во сабота, на 31 мај, во раните утрински часови ќе започне делумен прекин на водоснабдувањето во повеќе скопски населени места поради изведба на приклучок на главниот магистрален водовод, информира ЈП „Водовод и Канализација“ – Скопје.
Без вода ќе останат делови од Визбегово, бул. „Босна и Херцеговина“, Чаир, Топанско Поле, Автокоманда, високата зона на Железара и Бутел 1. Активностите ќе започнат точно на полноќ (00:00 ч.), а се очекува да завршат во рок од 15 часа.
Од претпријатието велат дека целта на проектот е подобрување на водоснабдувањето и стабилизирање на притисокот во мрежата, како и намалување на загубите на вода.
Во рамки на проектот ќе се изврши монтажа на игличест регулационен вентил и поврзување на постојниот магистрален цевковод Ф1600 мм кај Железара со магистрален цевковод Ф700 мм на бул. „Александар Македонски“. Преку новиот цевковод долж бул. „Хрватска“ ќе се овозможи формирање на циркуларен прстен меѓу двете главни водоводни линии во Скопје.
ЈП „Водовод и Канализација“ најавува дека ангажирани се осум екипи, целосна механизација и логистичка поддршка за брза и безбедна реализација на активностите. Сите подготвителни проверки на вентили, испусти и хидранти се веќе спроведени.
