СПАСОВСКИ: Власта спогодбата со Британија ја турка како меѓународен договор
Пратеникот од СДСМ, Оливер Спасовски денеска во Собранието изјави дека власта спогодбата со Британија ја турка како меѓународен договор.
Вели дека не може да се зборува за ратификација на меѓународен договор кога во македонската верзија стои дека станува збор за договор меѓу двете влади, додека во англиската е користен терминот „arrangement“, односно спогодба.
Втората работа на која што укажа Спасовски е различно потпишаната функција, што според него го прави договорот ништовен.
„Ако ги погледнеме двете верзии, посебно ако ја видиме англиската верзија, каде што е потпишан договорот, ова е ништовен документ. Зошто е ништовен документ? Затоа што пишува дека го потпишал „Vice President of the Republic of North Macedonia“. Значи, ние како држава немаме потпретседател на Република Северна Македонија. Таква функција последен беше Љупчо Георгиевски. А во македонската верзија стои дека го потпишал „Заменик-претседател на Владата на Република Северна Македонија“. Ако е вака, тогаш нема апсолутно важност ваков еден договор — или спогодба, како сакате наречете го — и тоа ќе мора да се исправи“, рече Спасовски.
Инаку, во Собранието денеска помина Договорот со Британија. Премиерот Христијан Мицкоски го поздрави овој потег.
