Совет на јавни обвинители: Нов претседател по локалните избори!
Денеска се одржа 28-та седница на Советот на јавните обвинители, на која беше донесена одлука за престанок на функцијата претседател на Советот за Душица Димитриеска, поради истек на нејзиниот мандат на 1 октомври годинава.
Изборот на нов претседател беше одложен за после локалните избори, така што до изборот нов претседател ќе раководи заменик-претседателот Башким Бесими.
Во рамките на точката „разно“, државниот јавен обвинител Љупчо Коцевски се осврна на проблемите со кои се соочува Јавното обвинителство, посочувајќи недостиг на јавни обвинители и службеници, како и ограничени финансиски средства кои ја отежнуваат нормалната работа на институцијата.
