Собранието на Лос Анџелес во боите на македонското знаме во чест на жртвите од трагедијата во Кочани
Градското собрание на Лос Анџелес, во американската сојузна држава Калифорнија, беше осветлено во боите на македонското знаме – црвена и жолта – како симбол на сочувство и солидарност со жртвите од трагедијата што се случи на 16 март во дискотеката „Пулс“ во Кочани. Илуминатацијата започна синоќа во 20:00 часот и траеше до 6:00 часот изутрина по локално време.
Настанот, насловен како „Македонски ден на сеќавање“, беше организиран по иницијатива на градскиот советник Хуго Сото-Мартинез, кој преку својот профил на Фејсбук изрази длабоко сочувство за загубата на 62 животи и поддршка за македонскиот народ.
– Македонската заедница во Атвотер Вилиџ и пошироко низ Лос Анџелес, иако малубројна, е енергична и длабоко вкоренета уште од 1960-те години. Како град длабоко жалиме за загубените 62 животи во пожарот во ноќниот клуб „Пулс“ и ја изразуваме нашата солидарност со македонскиот народ во неговата борба за правда, исцелување и надеж за посветла иднина – напиша Сото-Мартинез.
Солидарност изрази и македонската православна црква „Пресвета Богородица“ од Лос Анџелес, која се заблагодари за гестот на локалната власт и подвлече дека „единството и сочувството меѓу луѓето не познаваат граници“.
– Оваа трогателна почит, која се оддава на три месеци од несреќата, ќе биде потсетник дека нашето единство и сочувство, дури и преку океаните, остануваат непоколебливи – стои во објавата на црквата.
На 16 јуни се навршија точно три месеци од пожарот во дискотеката „Пулс“ во Кочани, кој се случи во раните утрински часови и однесе 62 животи, а над 200 лица беа повредени. По истрагата, Основното јавно обвинителство поднесе обвиненија против 34 физички и три правни лица за тешки дела против општата сигурност.
