Мицкоски најавува ново решение за стабилизирање на цените на храната

Премиерот Христијан Мицкоски денеска од Битола најави дека Владата наскоро ќе излезе со предлог-мерки за ублажување на растот на цените на прехранбените производи.

Иако не откри детали, Мицкоски посочи дека внимателно се следи пазарната состојба и дека се работи на системско решение со вклучување на експерти, трговци, производители и дистрибутери.

– Се консултираме со екпертската јавност, следиме што се случува со однесувањето на трговците, производителите, дистрибутерите и на ланците на трговци така што ова е еден сериознен процес во којшто сериозно навлегување и мислам дека многу скоро ќе излеземе со предлог решение, рече Мицкоски, одговарајќи на новинарски прашања.

Министерот за економија Бесар Дурмиши викендов во изјава за медиумите рече дека Пазарниот инспекторат ја следи состојбата, но дека не е забележано драстично зголемување на цените.

– Нема драстично зголемување на цените во делот, каде што ние сме надлежни, во делот на прехранбени основни производи. Секој месец, Државен пазарен инспекторат ќе биде на терен ќе гледа, ако случајно се случува да имаме зголемување енормно без економски оправданост од трговците на цените, нормално дека ќе донесеме пак одлуки и тоа сум кажал и во други изјави дека ќе донесеме поригорозни мерки од тоа што сме ги презеле досега, изјави Дурмиши.