Со сегашнава динамика за 300 години Куманово целосно ќе се гасифицира
Дури 300 години се потребни Куманово целосно да се гасифицира, покажуваат анализите. Годишно се гради само еден километар гасоводна мрежа. Севкупно изградени се 23 километри, што е помалку од 10 отсто од предвиденото. Претпријатието нема капацитети мрежата да ја развива од сопствени средства.
„Ако земеме дека имаме 350 км можност да се рашири во градот, да се стигне до секој дом, претпријатие, институција ако градиме по толку годишно, треба многу време за да се гасифицира цело Куманово. Доколку не влезат поголеми средства дали од влада или општината, за да може да се рашири“, истакна Марко Митровски, директор ЈП „Куманово гас“.
Куманово е првата општина која од 2006 почна со гасификација. На мрежата се приклучени 32 правни субјекти и 196 домаќинства. За да ги стимулира граѓаните, општината доделува и субвенции за приклучок. Лани за првпат средства одвои и Министерството за економија. Но, кризите ја зголемија цената на енергенсот, а го намалија бројот на потрошувачи. Во моментов изнесува околу 60 денари. Големите корисници, меѓу кои и општата болница, сега користи природен гас. Но Куманово и оваа сезона не е имуно на аерозагадувањето.
„И од стари автомобили застане тој чади и од дрва се горело порано, но убави сега кој што најде. Комшија кога ќе запали не можеш да отвори прозорец се ставаат пластика, се“, вели еден кумановец.
„Оваа прашина ја чувствуваме на очите, веројатно мора да има нешто“, дополнува друг.
Анализите покажаа дека најголем загадувач во Куманово се домаќинствата кои користат несоодветни материјали. Мерните станици не даваат целосни резултати.
Со цел надминување на проблемот со аерозагадување Куманово усвои и план со краткорочни и долгорочни мерки. Освен гасификација, тој опфаќа и пошумување и метода аеросолизија.
Од Секторот за инспекциски надзор најавуваат дека ќе продолжат со надзор во работилниците, компаниите.
„Ќе се проверуваат и автомеханичарски работилници како и досега, вулканизерските работилници каде завршува отпадот од гуми кој често се запалува од наши несовесни сограѓани“, изјави раководителот на одделението, Бобан Бојковски.
Во Куманово нема голема загадувачка индустрија. Инспекцијата лани по контролите и пријавите, санкционираше една компанија.
Елена Георгиевска
