Со Америка управуваат 80-годишници: Едниот зјапа во празно, другиот постојано паѓа
Лидерот на републиканското мнозинство во американскиот Сенат, Мич Меконел има 81 година, а претседателот Џо Бајден со 80 години е најстариот американски претседател во историјата на земјата. Поради ова се почесто се поставува прашањето дали со САД управуваат „старци“.
Во средата, Меконел паузираше на средината на реченицата и молчеше следните дваесет секунди, а потоа беше однесен, за подоцна да се врати и да каже дека е „добро“.
Тоа беше последниот во серијата настани во кои водечките американски политичари покажуваат знаци на старост.
На 80-годишна возраст, претседателот Џо Бајден е најстариот американски претседател во историјата на земјата и е речиси две децении постар од просечната возраст на другите светски лидери, според Pew Research, пренесува Index.hr.
Неговата напредна возраст предизвика дебата за тоа дали треба да се кандидира за втор мандат во Белата куќа. Бајден се сопна преку вреќа со песок на сцената во јуни, падна качувајќи се на владин авион две години претходно, оди полека и често се лизга.
Ако Американците сакаат некој помлад на претстојните избори следната година, нема да бидат задоволни со Доналд Трамп, актуелниот миленик на републиканците, кој има 77 години. Анкетата на Ројтерс покажува дека мнозинството Американци мислат дека ниту еден од нив не треба да се кандидира поради нивната возраст.
Сепак, актуелниот претседател на САД не е ниту во првите десет моментално најстари светски лидери, предводени од претседателот на Камерун, Пол Бија (89). На листата е и палестинскиот претседател Махмуд Абас (87).
Од друга страна, Бајден е помлад од некои членови на Конгресот. Републиканскиот сенатор Чак Грасли има 89 години, демократската сенаторка Дијана Фајнстен исто така има 89, а сенаторот Берни Сандерс има 81 година.
