СКРАТЕНА КАЗНАТА ЗАТВОР ЗА СУДИЈАТА НАЌЕ ГЕОРГИЕВ Летово ќе излезе на слобода по одлежување казна од 2 години и 2 месеца
Скратена е казната затвор на поранешниот врховен судија Наќе Ѓорѓиев, кој беше осуден за примање мито, откако Апелациониот суд Скопје му го уважил барањето за условен отпуст и ја преиначил одлуката на Кривичниот суд, со што стана и правосилна.
Според потврдената одлука, Георгиев нема да остане во затвор до мај 2027 година, туку ќе излезе веќе летово, што значи дека вкупно ќе одлежи околу две години и два месеци, објави порталот Скопје 1.
Претходно, Кривичниот суд му ја намалил казната за тој да излезе од затвор во септември годинава. Георгиев на тоа решение поднел жалба до Апелација, каде дополнително му е скратена казната за уште два месеца.
Во жалбата Георгиев навел дека се однесувал примерно во затвор, ги почитувал правилата, но и дека има 63 години и нарушена здравствена состојба. Овие аргументи биле прифатени од судот.
Според порталот, дел од казната Георгиев веќе ја издржувал во олеснет режим. Од мај минатата година бил ангажиран како магационер, при што излегувал од затвор во текот на денот, а се враќал навечер, практично само преспивајќи во ќелија. Користел и викенд-отсуства.
Како што е познато, судијата Георгиев беше фатен како зема мито од 10.000 евра. Тој се спогоди со Обвинителството за гонење организиран криминал и корупција во предметот за примање мито од синот на поранешниот градоначалник на Ново Село, Боро Стојчев за казна затвор од три години, како и забрана за вршење професија, дејност или должност на службено лице во траење од три години.
.
