„Шверцери“ без билети за мечот Албанија – Србија, револтот ќе го искажат на плоштадот „Скендербег“
Навивачката група на Шкупи, „Шверцери“, изрази длабоко разочарување поради тоа што не доби билети за квалификацискиот натпревар меѓу Албанија и Србија, кој ќе се одигра во сабота во Тирана. Фудбалската федерација на Албанија не одобри влезници за оваа група, што ги натера „Шверцери“ својот револт да го искажат преку јавен собир.
Протестот е најавен да се одржи на плоштадот „Скендербег“, токму во времето на одигрување на мечот – во сабота од 20:45 часот.
„Сакаат да не поделат, но не можат тоа да го направат со билети, правила и наредби. Ние сме гласот на трибината кој никогаш не запира. Ние сме ‘Шверцери’, црвено-црни. Или си со нацијата или си против неа“, стои во соопштението на навивачите од Чаир.
„Шверцери“ не се единствените кои останаа без билети – и други навивачки групи од Албанија добиле известување дека мора да набават влезници по редовна постапка. Огромниот интерес за натпреварот резултираше со вистинска „битка“ за влезници – за 22.000 билети аплицирале над 200.000 луѓе.
Мечот е класифициран како настан со висок ризик, поради можните инциденти меѓу навивачите, што е дополнителна причина за внимателниот пристап на организаторите.
